Real Cricket 2020 [Multiplayer Game] Review In Hindi

Estimated read time 10 min read

Real Cricket 2020 [Multiplayer Game] Review In Hindi: Dosto, aur mere desh vasiyo jo bharat desh main rehte hai aur videsh mai rehte hai, aapka dost Manish aapke liye laaya hai Real Cricket 2020 Multiplayer Game ka review apni hindi bhasha mai. India main jo sabse jyada dekhe aur khelne wala game ban chuka hai.

Log cricket ke itne deewane hai, ki koi bhi match hota hai, to unki bheed lag jati hai. IPL aur International format hi nahi gully cricket ke bhi deewane badhte jaa rhe hai. Aur ab isi beech Online cricket Game bhi dhoom macha rahi hai. Chote chote 5 se 6 saal ke bacche android mobile par game khelna seekh gaye hai.

Aur koi bhi game jaise hi launch hota hai, cricket ka, to public apne mobile mai download kar leti hai. To chaliye aise hi ek game jiska naam hai, Real Cricket 2020, jiske online multiplayer ka review.

Real Cricket 2020 Multiplayer Kyu Hai Badhiya Game?

Jaisa ki aap sab jante hi hai dosto, Multiplayer ka matlab hota hai, hum ek se jyada logo ke saath , ya aamne samne match khel sake ek dusre ke viruddh. Real Cricket 2020 Multiplayer hamein woh sari suvidha pradan karta hai, aur itna hi nahi is tarah se pradan karta hai, ki aap apni strategy bana ke khel sake, chahe woh phir batsman ho ya bowler.

Isme aapko fielding ki setting se leke bowler choose karne ka option milta hai. Agar aap real cricket 2020 apne mobile mai khel rahe hai, to aapko bata du, yeh game ke heavy aur light version dono mojood hai.

Light version main aap kam MB wala Real cricket 2020 download kar skte hai. Aur Heavy version game aapko 500 se jyada MB mai Playstore main download karne ke liye available hai.

Batsman Ke Angle Se Real Cricket 2020 Multiplayer Game:

Real Cricket 2020 Multiplayer Game mai aapko Multiplayer version main toss jeet kar batting ya bowling choose karne ka option milta hai. Agar aap ballebaaji ke shokeen hai, to aapko bata du, isme match main enter hone se pehle aap 2 over ya 5 over select kar skte hai.

Ab aapne manlijiye 5 over format choose kiya hai, to aapko 1st batting karni hai aur jyada se jyada run score karne hai. Jisse apko opponent ko harane mai aasani ho.

5 Over main se pehle 2 over aapko fielding restrictions ke saath khelne hote hain, jisme 30 yard circle se sirf 2 fielder bahar hote hai, jiska aap bharpoor fayda uthaye aur in 2 over main agar aapki ballebaji skills acchi hai to 25-30 run aasani se bana skte hai, maine aise players bhi dekhe hai, jo 2 overs main 50 run tak jad dete hai.

Sabse badhiya cheez real cricket 2020 multiplayer game ki yeh hai, ke iske shots aapko bahot real lagte hai, aur jaise aap real ground main , apna dimag laga ke shots khelte hai cho tarfa, waise hi yaha bhi ” Controls” select karke aapke suvidha ke anukool, aap khel skte hai.

Isme aapko alag alag types ke controls milte hai khelne ko. Jo controls aapko is game me dekhne ko milte hai, woh kuch is prakaar hai

Pro Joystick: Jisme aapko joystick milti hai, jisse aap shot ka direction manually choose kar skte hai, ke konsi ball par kaisa shot khela jaye

Joystick: Isme apko classic controls milte hai, jisme aapko shot khelne ka option kam dekhne ko milte hai, main aapko yeh bilkul bhi recommend nahi karunga, baki aap khel ke dekh skte hai.

Legacy Swipe: yeh option mera favorite option hai, isme aapko shot selection ka time jyada mil jata hai, aur agar bowler spinner laga laga ke jaldi gendbaji karwa raha ho to yeh option se aapko sochne ka time jyada mil jata hai. Itna hi nahi dosto, yeh option use karke aap ek behtar shot playing control hasil kar pate hai.

Classic Swipe: Yeh option bhi aapko apni ungliyo ke dum pe shot khelne ki ijazat deta hai, bas fark itna hai, yeh control unhi logo ko use karna chahiye, jinhone abhi abhi game download kiya hain aur jo game ko samjhne ke mode me chal rhe ho.

Also Read: What is the difference between Real Cricket 2019 & 2020 Multiplayer Mode?

Real Cricket 2020 Multiplayer Camera Mode Kaise Use Kare:

Camera angle ki baat ki jaye to isme batsman ko 2 se 3 prakaar ke broadcast mode aur batting near , bowling near, pro mode milte hai, isme aap apne prakaar se batting camera angle badal skte hai, aur jisme aapko batting krne main jyada aasani aur realistic approach najar aata ho wahi set krke game khelna shuru kare.

Broadcast Mode: Jaise aap cricket ko TV par dekhte hain, yeh mode kuch usi prakkar hai, yaha aapko live match wali feeling aati hai, jisme aap batting khud krte huye shot selection ka anand le skte hai, aur replay bhi dekh skte hai, bowler ne kaisi ball daali aur aapne kaisa shot khela hai, yeh sab aapko replay main dekhne ko mil jata hai.

Pro Mode: Yeh mode real ground main aap swayam batting kar rhe ho aisi feelings dene ke liye banaya gaya hai, is mode ki khasiyat yeh hai, ki isme aap apne dimaag ko bilkul real life cricket ke hisaab se adjust kr skte hai, aur jaise aap ground main ball khelte hai, waisi feeling aati hai.

Agar off side ki baal ki gayi he to timing ke saath aap behtar tariqe se shot maar skte hai, aur agar leg side main ball ki gyi he to aap usi prakaar se apne dimag ko set krke batting krke leg side me 2 run ya phir single, ya phir loft krke 6 maar skte hai.

Shot Selection In Real Cricket 2020 :

Real cricket 2020 mera favorite game isliye hain, kyuki isme aapko batting karne main bahot maja aata hai, ji haa aap jaise real life cricket dekhte hai, waise hi isme bhi aapko different shot choose krne ka moka milta hai, aur jaha se fielder na ho waha se gap nikla ke ground shot aur fielding defending mode me set ki gayi ho to kaise chalaki se loft shot use krke chogga aur chakka marne ka moka milta hai.

Aap bas itna dhyan rakhe aapki timing bahot important hai shot selection main, ball ka direction, jaise ki ball swing ho rhi ho, slower ball ho, spin ball ho, sab balls main apko bahot dhyan se shot khelne hote hai.

Shot selection ki agar baat ki jaye to aap woh har ek shot, jo aap real ground me dekhte hai, aap aasani se is game me dekh payenge. Different shots jaise off side single, gully single, leg side single, ground shot for chogga(4s) alaga alag dishayo main, waise hi six marna me bhi aapko maja ayega.

Download Real Cricket 2020 For Android: Click Here

Download Real Cricket 2020 For IOS(Apple Devices): Click Here

Real Cricket 2020 Multiplayer Game Review From Bowler’s Perspective In Hindi:

Dosto, aaj ka time waise bowlers ka bahot kam reh gaya hai, cricket ek batting pradhan game ban chuka hai, aise main bowlers ko Real Cricket 2020 ne bahot jyada izzat pradan ki hai, ji dosto yeh bilkul sach hain, jaisa ki aap jante hai, bowlers alag alag angle se bowling to krte hi hai, balki bowling main variation ki bhi bhumika bahot jyada hain, aise main konse bowler ko kaisi gendbaaji krni hai, woh usko khud apne dimaag main bethana jaruri hai.

Spin Bowler: Spin bowler ki bhi alag alag category hoti hai, jaise leg spin, off spin, arm spin bowling. Ab important yeh hota hai, spin bowler apni bowling se kaise batsman ko chakma deke out kare aur apni bowling main kam se kam run kharch kare. To dosto, Real cricket 2020 Multiplayer main, spin bowler ke liye bhi bahot sari varities hai, jaise woh drifter gend ka accha istemaal krke batsman ko chakma dete huye uski wicket le skta hai.

Waise hi kabhi kabhi ek aad gend googly phek ke woh batsman ko out kr skta hai. Aur agar batsman jyada bahar nikal ke advance shot khelne ki koshish kar rha ho to usey Arm ball phek ke bold aur stump out bhi kr skta hai.

Ji dosto, spin bowling ka use krke aap lagataar maiden overs phek skte hai, main jab bhi 5 over ka match khelta hu, jyadatar spinners ka use krta hu, aur yeh bhi dekhta hu, samne wala batsman kaisa hain, defensive hai to jyadatar ball straight deta hu aur agar bahot jyada shot khelne ki koshish kr rha hai to different variations ka use bhi krta hu aur mera safalta ka ration 85% rehta hai.

Fast Medium, Medium Fast aur Fast Bowler: Ji dosto waise ho yeh sab category ke bowlers ko khelna bhi aasan to nhi lekin, main aksar aise bowlers se bhi accha khasa kaam nikal leta hu.

Yaha mera favorite Fast bowler se kyada medium fast bowler hai, jaise Virat Kohli se straight bowling krwa ke mai aksar maiden over krwa deta hu, lekin yeh skills ki baat hai, har koi aisa nahi kr payega.

Moreover iske liye aapko batsman ko samajhna jaruri hai, agar batsman chalak hai to fielding main kuch chamges krke aap virat kohli type bowler ka accha istemaal kr skte hai.

Isme apko dhyan rakhna hai, hamesha 2 over ke baad hi Virat kohli type bowler ka istemaal kre. Leg & off side main fielding set krke aur sahi jagah pe tappa daal ke aap aise bowlers ki ek over main 3-4 wicket bhi chatak skte hai, bas aapko dhyan dena hoga bowling line aur apni swing ko bhi thoda niyantrit krna hoga.

Fielding: Yeh option apko batsman ke virudh jaal rachne main sahayta krta hai, yaha aap manual,aggressive, defend, normal jaisi fielding set krke batsman ko apne bowling ke jaal me phasa skte hai, agar aapne sahi tarah se fielder set kiye huye hai, to aap 3 runs ko 2 runs me convert kr skte hai aur ek run ko lagataar rok skte hai, aur itna hi nahi 4s ko bhi rok skte hai.

Acchi bowling ke saath fielding option ka istemaal krna aapko sikhna hoga agar ballebaaji team ko kam run me rokna hai. Kuch cheeze jaise manual fielding ka option abhi isme he lekin fielding to automatic hi hoti he aap sirf manually fielder se kr skte hai. To chaliye iske saransh ki aur badhte hai, kaisa he over all Real Cricket 2020 Multiplayer Game

Conclusion:

Cricket Lovers ke liye yeh game sabse best hai mobile phones platform par, phir aap Android me khelte ho ya IOS par, yeh game aapka time paas krta hai aur aapko kuch had tak isey khelne ki aadat bhi lag jati he.

Aur jis tarah se real cricket 2020 game market me dhoom macha rha hai, isey dekh kar yehi lagta hai, Real Cricket 2021 game main aap graphics ke saath saath aur AI matlab Artificial Intelligence dekh payenge.Real Cricket ke developers ne yeh game bahot mehnat se aur acchi tarah se banaya hai.

Aap isey download krey aur khele. Lekin bacche jo padhai krte hai aur nokri pesha log bhi isey entertainment ke liye 1 ghanta hi khele, taaki aap apne parivar ke liye bhi dhyan de ske aur baccho ki padhai pe koi nuksan na ho. Aur batana na bhuliye kaisa laga aapko Real Cricket 2020 Multiplayer Ka review in Hindi.

ManS http://techtipsmanish.com

Hi! My name is Manish and I am a blogger. I founded Tech Tips Manish in 2018 initially to share about tech, sports, you tube, cricket, games, entertainment, blogging, wiki, places, finance when the journey of this blog started.

Apart from continuing providing the information of the topics like technology, blog, seo, online money, etc., I wanted to reach the average person who was looking to better their lives and which can be done using the latest technology.